Untuk mendapatkan space iklan dihalaman ini silahkan hubungi owner Blog Design, Kami akan secepatnya merespon dan mempertimbangkan letak dari iklan text dan banner anda...

Friday, November 15, 2013

Yohanes 15:1–8

Bagian ni hata partadingan ni Tuhan Jesus do turpuk on na marrumanghon tudosan (perumpamaan). SangkapNa, asa marguna ngolu ni angka siseanNa di portibi on, unang holan na numpang mamolus boti pamatangna be jalanaeng sintong hadirionna be di na laho mangihuthon Tuhan Jesus Kristus.  Dung i ingkon tangkas do diboto be, diingot songon dia parsaoranna be tu Tuhan i laos dipadimundimun denggan. Mardomu tusi do panggombarhonon ni Tuhan Jesus nuaeng, marhite tudosan hau anggur dohot angka rantingna, parbuena nang tu nampunasa i pe. Marhite illustrasi i gabe mura do antusan ni manang ise pe tinuju ni Jesus.
Tarbarita do hinadenggan ni hau anggur sian Palestina sian na jolo sahat tu tingki on. Godang do hagunaan ni anggur di ngolu ariari ni angka pesta. Dalam batas tertentu, dipangke do i gabe pelean siinumon (2 Musa 29:40), alai sai dipaholang angka malim do i hatiha laho bongot tu undungundung (panghobasion) sebagai disiplin pelayanan nasida (3 Musa 10:9). Na boi muse do aunggur i mandaoni sahit ngali manang daon ni butuha songon tinonahon ni Paulus tu si Timoteus (1 Tim. 5:23).
Denggan do botoonta deba sian kegiatan ni pertanian anggur, ai ingkon  ias do anggur i jala dinapui do tano hatubuanna. Bahenon do panjangkitan ni andorna. Umumna, subur do partubu ni anggur, alai ndang sude na subur tubu marparbue. Alani ingkon sai paiason do bona ni anggur i. Angka ranting na so ringkot, i ma ranting na so olo marparbue, somalna digotapi do i asa denggan marparbue. Halak na so somal mananda hau anggur, maol do mananda dia ranting na olo marparbue dohot dia na so olo marparbue. Alai anggo angka partani anggur manigor diboto do dia ranting na olo marparbue jala dia na so olo marparbue. Sangkap ni “pemangkasan” ranting i, asa unang mangganggu do tu na olo marparbue, ai holan na pasudasuda zat makanan na disupply ni batangna do i. Asa tarida ma ndada kesuburan di bulung dohot ranting (uli bulung dohot godang ranting) ni anggur na ni haringkothon, alai parbuena do. Ai tujuan ni na manuan anggur tontu do asa marparbue, ndada gabe hiasan (jagarjagar) manang uli idaon  sajo.
Menarik do muse tu roha taringot tu ranting na ginotap hasomalan ni halak Jahudi. Nang pe adong hasomalan ni Jahudi laho pasahathon soban tutungon tu Bagas Joro, alai anggo ranting ni hau anggur i tung na so boi do pasahaton tu Bagas Joro. Jadi ujung ni ranting naung ginotapan i holan ditutunghon ma i, ai so marnosan antong jala godang sirabunna.

II.    HATORANGAN


1.      Porlak anggur ni Debata do bangsoNa

Molo di halak Jahudi ndang pola hal na imbaru manggombarhon bangso Israel songon hau anggur (Jer.2:21; Jeh. 15:1-8; 19:10-14; Hos. 10:1; Psalm 80:9-17), didok do muse kobun anggur (Jes.5:1-7). Alai di sude pandohan i martudutudu tu ketidakbaikan, na liar jala na sega songon na niida ni angka panurirang. Alai nuaeng di bagasan Jesus adong “hau anggur na tutu” (alethinos, benar, sungguh-sungguh, asli). Pandohan na tutu di son laho patuduhon haasinganna sian Israel/Jahudi naung sega i (degenerasi = kemerosotan). Alani molo naeng denggan nasida ingkon di bagasan hau anggur na tutu i nama, jala nampunasa pe tangkas do, i ma Debata Ama. Di bagasan hau anggur na tutu i, gabe ranting ni Jesus ma nasa jolma na porsea di Ibana. Jala laos on do patuduhon, paboa marhite angka na porsea i, di angka ingananna, na gabe hataridaan ni Kristus do nasida be. On do nang na patuduhon, na mangula do Tuhan i di ganup inganan, ganup tingki, marhite angka na porsea di Ibana. Alai ndang holan marhite angka na porsea i, nang marhite huasoNa sandiri pe mangula do Ibana di sandok portibi on.

2.      Ranting na Denggan Lohot do Marparbue
Marhite patujolo na di ginjang nangkin, nuaeng boi ma antusan pandohan ni Jesus sian ayat 2-6. Nunga dipaias na porsea i, marhite Barita Nauli na binoan ni Jesus, alai ndang sae holan ias, ingkon tong do lohot tu batang ni anggur na tutu i, asa boi marparbue. Ai i do sintongna, boha marparbue ranting na so mian di batangna! Jala na mian di anggur na tutu i, marparbuehon na denggan. Tarida di son, ndang holan parbue i na rumingkot sipingkirhonon ni ranting i, alana bonana i do na mambahen marparbue jala sian Ibana (Jesus) do na manontuhon siparbuehononna i. Antong aha do na rumingkot si parrohahonon ni ranting? Alusna hamiaonon (halohoton)-na di Jesus (Bona) i do na parjolo jala naumporlu sipamanaton dohot sipatureon, sipauliulion ni angka na porsea, taringot tu siparbuehononna, na mangihut ma i hombar tu lomo ni Tuhan i tu ganup hita on. Pandohan “mian hatangKi di bagasan hamu” pe di son, maksudna asa tangkas do hita manjamothon, manjagahon huhut pahembanghon naung jinalona sian Bona i. Hombar do i muse tu ayat na mangihut di ayat 16, paboa na Ibana do mamillit jala marsuru asa marparbue.
Taringot tu na mamparbuehon i, songon on ma pandok ni si Paulus: “Ndada tau hami sian dirinami, anggo tung mamingkiri agia aha sian dirinami, sandok sian Debata do hatuaonnami” (2 Korint 3:5). Dihatindanghon ibana do, ia haboionna marbarita na uli ndada sian dirina sandiri i, alai holan ala ni asi ni roha ni Debata do i (I Korint 15:10). Jadi na pinarbuehon ni angka na porsea i, ala asi ni roha ni Tuhan do i.

3.    Dioloi Tuhan i do na Mian di Ibana

Di ayat 7 diondolhon do kelengkapan ni hamianon di bagasan Jesus, i ma marhite na mian di hataNa. Tontu na mian di hataNa ndang holan pengakuan dohot pelafalan secara verbal sajo nidokna, alai pangoloion dohot pangulahonon di Hata i do patuduhon na mian sadasada halak di hataNa. Halak na mangulahon hata i do na nidokna, dioloi Tuhan i pangidoanna. Di Markus 11:24 didok Tuhan Jesus do, “Saluhutna, manang dia pe dipangido hamu di tangiangmuna, sai na sahat do i tu hamu, asal porsea hamu, ingkon jaloonmuna.”
Na gabe persoalan di ngolunta, sude do na tapangido lehonon ni Tuhan i? Laho mangalusi i taida ma dirinta, tutu do mian di bagasan Tuhan i hita manang na mian di dirinta sandiri do? Ai boi do panghilalaanna manang pengakuanna dohot lagak/gayana hira naung di bagasan Tuhan i, hape ndang tutu. Ai halak na mian di dirina sandiri, lomo ni rohana, angka na ringkot di pardagingon dohot haportibion do dipangido i. Mandele molo so dapotsa jabatan, marungutungut molo so toho tu rohana pandohan ni donganna. Manat! Angka na so tutu mian di bagasan Jesus do pe halak na songon i pangidoan dohot sikapna.
Alai halak na mian di Tuhan i, lomo ni roha ni Tuhan i, nasa na mambahen sangap goar ni Tuhan i, i do dipangido ibana na saut marhite dirina di ngolu ariari. Molo pe  ndang manigor toho songon na di rohana i, alai sai dilului do dalan jala diauhon do marhite na masa tu ibana naeng marsangap Tuhan i. Alani lam toruk do roha ni halak na mian di bagasan Tuhan i, molo tercapai sesuatu manang so tercapai dope.

4.    Naeng Marsangap Debata Marhite na PorseaNa
Na porlu siingoton ni angka na porsea naung marparbue, on do: ndada holan parbue i tujuan akhir lumobi muse molo nirajuman parbue i naeng mamboan goar tu diriniba sandiri. Manang molo dung adong diparbuehon na denggan, manigor dihirim rohana ma penghargaan sian portibion, songon angka na dapotan prestasi di portibi on mandapot hadiah, sertifikat manang medali dohot angka na asing i. Ndang i! Alai naeng marsangap do Debata Ama marhite angka parbue i (ay.8). Jala parbue i ndang holan sada, alai didok godang. Tutu di turpuk on ndang digoari rumang ni parbue i, alai secara garis besar i ma angka ulaon na mambahen marguna tu dirina tu halak na asing (songon anggur i). Secara allegoris dohononta ma, i ma angka na boi menghangatkan, mambahen hiras roha ni donganna jolma. Jala di udut ni turpuk on, di ayat 17 didok do, paboa ngolu na di bagasan holong ni roha do parbue na dimaksudna. Dung i muse molo tapahombar tu 1 Johannes 4:20, halak na marholong ni roha tu donganna, didok, i do hataridaan ni na manghaholongi Debata Ama. Antong ianggo impola ni parbue na denggan i, i ma holong ni roha. Jala laos taingot ma, ia disi adong na marsihaholongan, disi do Debata (1 Johannes 4:12). I ma hajonohan ni Tuhan i tu hita jolma, laos i ma patuduhon hapataranNa di portibi on, marhite holong ni angka na manghaporseai Ibana.
Nuaeng dapot ma sada prinsip hidup di na olo lohot (mian) di bagasan Jesus, ingkon marsangap Debata marhite ulaonna be. Alani do asa didok Paulus, ”asa di Debata hita marparbue” (Rom 7:4). Secara praktis di parngoluon ni Kristen, dirimpun ibana do, “Onpe …. manang dia pe diula hamu; bahen hamu ma i saluhutna pasangaphon Debata” (1 Korint 10:31). Ia dung songon i ngolu ni na porsea, i ma mambahen sangap Debata Ama, singkop ma hita on gabe sisean ni Tuhan Jesus.


III.    PANIMPULI


1.      Ringkot do ganup tingki pamanaton manang na mian di Tuhan i do ngoluniba manang naung mian di bagasan soara ni portibi on do. Ai adong do siarsakhonon nuaeng on paboa na adong kekosongan spiritual, lumobi ma na berlatarbelakang Kristen belahan bumi bagian Barat. Idaon hira sukses, alai jiwa ndang tentram jala ndang adong pos ni rohana be. So tung masuk hita tu keadaan na songon i, ala ni patingkos be hasolhotonna tu Tuhan i, asa boi marparbe na denggan.
 
2.      Marparbue marlapatan marguna ngoluniba tu dongan jolma na nalnal marhite pambahenan marhite nasa na adong jinalo sian Tuhan i di bagasan holong. Alai tujuan akhirna ingkon bahen hasangapon di Tuhan i, ndang naeng tu diri sandiri. Ai na boi masa do marguna nian diriniba, manang dipargunahon dongan do ngoluniba, alai ndang bahen hasangapon di Tuhan i.
 
3.      Ala marhite hita tarida do pangulaon ni Tuhan i, jala naeng mamparbuehon holong ni Tuhan i do hita, alani ingkon lam jamot nasa halak Kristen patuduhon na mangula Kristus di bagasan dirina. Unang tarurak Kristus marhite dirinta. Paulus mandok Surat ni Kristus do hita sude na boi jahaon ni portibi on. Antong naeng ma patar Ibana marhite hita.
 
4.      Laos ingotonta do tema sentral ni hurianta HKBP di taon 2013 na mandok: “HKBP GABE PASUPASU TU PORTIBI ON” (1 Musa 12:2). Dia do parbue ni naung gabe Kristen hita be. Jala dia do parbue na boi hilalaon ni dongan na humaliang hita. Olo ma hita gabe hataridaan manang hapataran, kehadiran ni Tuhan Jesus tu na humaliang hita, marhite parbue na tama. Amen    

Pdt. M. br. Simorangkir

Terimakasih atas kunjungannya,Bila anda suka dengan artikel ini silahkan JOIN TO MEMBER BLOG atau berlangganan geratis Artikel dari blog ini, daftarkan email anda pada form subscribe dibawah halaman . Pergunakan vasilitas diblog ini untuk mempermudah anda. Bila ada masalah dalam penulisan artikel ini silahkan kontak saya melalui kotak komentar yang ada dibawah atau gunakan fasilitas yang ada diblog ini untuk menghubungi saya.

Salam Blogger.... !!! .

Me

Admin Rivai Silaban

Share article with : Google+ Facebook Twitter
Di posting oleh : Rivai Silaban Update pada : 1:32 PM

0 komentar :

Post a Comment

1. Komentar SPAM Akan secepatnya dihapus
2. Pastikan untuk " Berlangganan Lewat Email " untuk membangun kreatifitas blog ini
3. Cek komentar masuk sebelum bertanya.
4. Link aktiv tidak akan berpungsi.
5. Dilarang menyebarluaskan artikel tanpa persetujuan dari saya.
6. Untuk mengajukan pertanyaan diluar postingan diatas, silahkan klik " Forum Diskusi "
7. Bergabung dengan kami untuk menjadi member Klik " Join to Member "
8. Komentar yang mengandung code tag HTML, konversikan terlebih dulu silahkan klik " Konversi Kode "

Salam bloger .. !!
Pergunakan semua fasilitas di Blog ini untuk mempermudah anda..
Konversi Kode Forum Diskusi Join to Blog