1 RAJARAJA 3:4-14

Ndang pola tangkas ise na manurathon buku ni 1-2 Rajaraja on, alai na pasti buku on disurathon di tingki jaman Pembuangan di Babel (+ 550 SM). Sangkap panurat ni buku on naeng pasunggulhon bangso ni Debata asa mangoloi tona (poda) I Debata, dohot parsombaon na polin na holan tu Debata. Molo so I, hona uhuman ni Debata. Dalan tusi, berusaha ma panurat patuduhon angka dosa kegagalan nasida, I marhite na paandarhon pangalaho ni angka raja songon na mewakili nasida. Sasintongna marhite penilaian tu sahalak raja I, sekaligus menilai bangso do ianggo tinujuna. Ai ndada ukuran politis dibahen dasor penilaian, alai sian sudut keagamaan do, panghaporseaion di Jahowa do marhite pangulahonna be di lomo ni roha ni Tuhan I, ai ninna do di ganup ujung ni barita ni angka rajaraja I” ia melakukan apa yang benar di mata Tuhan: atau ia melakukan apa yang jahat di mata Tuhan. Di bagasan turupuk on, naeng idaonta sahalak raja na margoar Salomo na tigor di adopan ni Debata.

Hatorangan

Ayat4- 5 : Na daulat do roha ni Raja Salomo, ai pala didok “ Alai holong do roha ni Si Salomo mida Jahowa, marparange do ibana di angka aturan ni amana si Daud (ay 3). Tutu do, holong do rohana tu Jahowa jala dipatuduho do I marhite haringgashon mamele (ibadah) tu Jahowa di Gibeon. Dipelehon Salomo ma saribu pelean, laos disi ibana bornginna i. Di borngin I dipaandar Jahowa dirina tu Raja Salomo marhite nipi. Sada dalan do nipi dipangke Debata laho patuduhon sangkapNa (bdk. 1 Musa 20:3-7; Mat 1:20-24). Di peristiwa on idaonta do, Debata sandiri do na berinisiatif ro patuduhon soara na patar tu ibana, jala Debata sandiri muse mandok asa pangidoonna manang aha silehonon ni Debata tu ibana. Pandohan ni Tuhan I mansai torang, ia sipangidoan ni raja Salomo I ma: manang aha silehononNa, ndada aha na di rohana sambing. Jadi, molo marpangidoan hita tu Tuhan Debata naeng ma pangidoanta I hombar tu na naeng lehonon ni Debata, ndada hombar tu roharohanta. Alani I do, Jesus mangajarhon tu hita di tangiang Ale Amanami, na mandok”Sai sahut ma I hombar tu lomo ni rohaM”

Ayat 6-8 : Didok Raja Salomo do” Bajar dope ahu, jala ndang huboto ruhut tu balian manang dibagasan huta”. Naeng dohononan disi I ma “ndang berpengalaman dope ahu alani haposoonhu dohot parbinotonku tu uhum”. Pandohan I, patuduhon toruk ni rohana do i. Jala memang saurdot do pandohan na bajar I tu pengakuanna sandiri, paboa hehe pe ibana gabe raja di Israel, holan ala asi ni roha ni Debata tu raja Daud, amana I. Ndada ala naung adong karunia pemimpin di Ibana sandiri. Jadi, ala marharorohan sian Debata do sude na adong di ibana, gabe I do na mambahen ndang adong be keangkuhan na tubu di rohana dung gabe raja ibana, ndang songon toropan ni angka raja di portibi on.Dung gabe raja Ibana gabe adong di bagasan rohana keangkuhan dohot ginjang ni roha. Dung dipaaandar ibana hadirionna di adopan ni Debata, nuaeng dipaandar ibana ma ulaonna na ingkon patupaonna, di na nidokna: ia NaposoMon di tongatonga ni bangsoM do, naung pinilitMu, bangso na bolon, na so taretong jala na so habilangan dibahen deakna. Sian pandohan I, tiada do diboto ibana do borat ni ulaon I, ndang tuk ibana mangulahon I sian hadirionna. Alan I, ala ditanda ibana do hadirionna jala borat do ulaon I, i do na mangonjar ibana laho manjalo pangurupion sian Debata marhite dilehon Debata tu Ibana habisuhon.

Ayat 9 : Somalna, angka raja molo dipabangkit ibana gabe sahalak raja, pintor hasanggapon dohot hamoraon do dihalpuiti, alani I do gabe ndang adong be roha na marpanarihon tu rakyat, sehingga godang ma rakyat na gabe sengsara. Alai, taida si salomo ndang I dipangido ibana, manat do ibana marpangidoan tu Debata, dipangido ibana do ndanda na ringkot tu kebutuhan sandiri manang holan bermanfaat tu dirina sandiri dohot keluargana sandiri dipangido. Alai dipangido ibana do na bermanfaat tu na torop na ringkot jaloonna songon sahalak raja Ibana, I ma na boi mambahen keadilan, kesejahteraan dohot kedamaian di masyarakat. Sude na I boi tercapai molo adong do habisuhon. Alani I do dipangido ibana tu Debata ima roha na pantas (hikmat, hati yang paham). Habisuhon do laho membedakan dohot manirang na denggan sian na roa, jala habisuhon do dihaporluhon ibana asa boi mangulahon jala patulushon ulaon (jabatan) na jinalonna.

Ayat 10-14 : Ala pangidoan ni raja Salomo I, gabe lomo ma roha ni Debata tu ibana. Boasa? Ai sian pangidoan I tarida do motivasi na denggan di na gabe raja Ibana. Ndada motivasi asa mamora ibana. Ndanda asa ganjang umurna na martujuan asa leleng ibana mangarajai. Ndanda motivasi asa sanggap ibana. Ndang I motivasi ni si Salomo, alai holan asa marroha na pantas do ibana laho patupahon uhum dohot manguluhon bangso ni Debata. Ala, dijalo ibana do angka na ringkot tu bangso I daripada na ringkot tu dirina, ujungna gabe ditambai Tuhan I do pe na asing, na so pinangidona alai marguna di ibana, I ma hamoraon dohot hamuliaon. Jala molo torus marparange na denggan ibana,tumpahon ni Debata do ibana sampe matua (14). Jadi, sian I gabe taingot ma hata ni Tuhan Jesus na mandok di Mat. 6:33 “ Molo parjolo ni luluon harajaon ni Debata dohot hatigoraNa, tambahononNa do nang angka materi na ringkot di hita.

Sipahusorhusoron

Ganup do hita on dipabangkit Debata tu sadasada ulaon manang jabatan tertentu. Molo disungkun tu hita aha do na tapangido sian Debata ditingki hita laho mamulai ulaon i? Apakah kita meminta untuk kepentingan kita atau untuk kepentingan Orang banyak? .. Jadi dison, naeng dohonon ni turpuk on tu hita, ai nasa jolma na tahobasi marhite ulaon/ jabatan I, na manghobasi bangso ni Debata do I, manang na manghobasi na tinompa Debata do i. Molo ndang songoni motivasinta laho mangulahon siulaon, boi do I gabe menimbulkan keangkuhan di rohanta, na pasti I maralo do I tu lomo ni roha ni Debata na mangalehon ulaon I tu hita be. Alani tapaimbaru ma motivasinta asa songon motivasi ni si Salomo on ma nian motivasintabe, na so olo mangalului keuntungan diri sandiri.
Marhite turpuk on diajari do tu hita asa songon salomo na marpangidoan tu Debata. Mangido ma di bagasan toruk ni roha, jala hombar tu lomo rohaNa I ma na tapangido, molo songoni tapingido tu Tuhan Debata, lam tambahonon Na dope angka na asing tu hita, na ringkot pangkeononta laho patulushon ulaon na pinasahatNa tu hita. Alani,porlu do taingot hata na mandok “ Pangido ma aha na naeng lehonongKu, unang pangido aha na di roham”

Ditonga ni jamanta saonari I ma di jaman era globalisasi on, godang do angka tantangan na ingkon taadopi, na boi mangancam parngoluonta termasuk ma I partondiononta. Molo ndang manat hita boi do hita gabe madabu tu bagasan dosa. Alani I, asa unang hita madabu tu bagasan dosa I, tapangido ma tu Tuhan asa dilehon tu hita roha na pantas, asa marhite roha na pantas gabe tau hita lomo ni roha ni Debata, tau hita mamolati na denggan dohot na roa, jala tau hita mangulahon na denggan jala pasiding na roa.

Ditulis : Pdt. David Hutapea

Terimakasih atas kunjungannya,Bila anda suka dengan artikel ini silahkan JOIN TO MEMBER BLOG atau berlangganan geratis Artikel dari blog ini, daftarkan email anda pada form subscribe dibawah halaman . Pergunakan vasilitas diblog ini untuk mempermudah anda. Bila ada masalah dalam penulisan artikel ini silahkan kontak saya melalui kotak komentar yang ada dibawah atau gunakan fasilitas yang ada diblog ini untuk menghubungi saya.

Salam Blogger.... !!! .

Admin Rivai Silaban

Share article with : Google+ Facebook Twitter

Di posting oleh : Unknown Update pada : 8:18 PM